ከም ቀደም የለኹን !

ንሕና ተጋሩ ቅድሚ ነዊሕ ዓመታት ወነንቲ ግዙፍ ስልጣነን ምዕባለን ምንባርና መዛግብ ታሪኽ ይሕብሩ። ድኣማት፣የሓ ፣ ኣኽሱምን ኣዱሊስን ድማ ናይዙይ መርኣያ እዮም።
ኣብ ኣኻውሕ ዝተወቕሩ ምልክታት ኣብ ኣብያተ እምነታት ተዓቂቦም ዝርከቡ ፅሑፋት ብራና ድማ ናይዙይ ጭቡጥ ኣብነት እዮም። ንሕና ናይ ገዛእ ርእስና ቛንቋ፣ ባህሊ፤ መንነት፣ ዓወደ ኣዋርሕ፣ ቁፅሪ፣ ትውፊትን ድሙቕ ታሪኽን ዘለና ኣብ ዓለም ተደለይቲ ህዝቢ ኢና ኔርና።
ብስኒ ሓርማዝን ክቡር ዕንቁን ቅድሚ ኻልኦት ንግዲ ዝጀመርና ደቂ ኣባት ቀይሕ ባሕሪ፣ ደቂ ባሕሪ ነጋሲ፣ ደቂ ራእሲ ኣሉላን ሃፀይ ዮሃንስን ኢና።
ሎሚ ግን ብኣንፃሩ ታሪኽና ሃሲሱ ሓድነትና ላሕሊሑ ኣብ ዘሕንኽ መንነታዊ ውድቀት ተዘፊቕና ንርከብ። ከም ሳዕቤኑ ድማ ምስዘይ መሻርኽትና ተሻሪኽና ተቓረንቲ ሓቅታት ክነተዓርቕ ከቢድ ዋጋ ኸፊልና ኢና።
ስለዚ ካብዚ ኣሰካፊ ፀገማት ወፂእና ትንሳኤ ሓዳሽ ዓባይ ትግራይ (ምድረ ግእዝ) ጋህዲ ንምግባር ቆሪፅና ክንለዓል ይግባእ። ኣብዚ ድማ ናይ ጥበብ ሰባት ዝለዓለ ሓለፍነት ኣለና። ፅሓፋይን ኣምባባይን ወለዶ ንኽፍጠር ድማ ኣበርቲዕና ክንሰርሕ ይግባእ። ስለዚ ነዙይ መሰረት ብምግበር “ከም ቀደም የለኹን”,ዘርእስታ ካልአይቲ እኩብ ግጥምታት ዝሓዘት መፅሓፈይ ንንባብ ኣብቂዐ ኣለኹሞ ብተገዳስነት ኣምቢብኩም ሃናፂ ሪእቶኹም ሃቡኒ።

ፀጋይ ገ/ሂወት (ወዲ ራማ)