ብሄራውነት

ብሄራውነት ትግራይ ንወለዶታት ብዙሕ ዋጋ እናተኸፈለሉ ዝመጸ ውርሻ እንተኾነ እውን፣ ክልሰ ሓሳብ ብሄራውነት ኣብ ትግራይ ብንጹሩ ተተንቲኑ ብዘይምቕራቡ ግና እቲ ቃልሲ ብሄራውነት መጋበሪያ ውልቃዊ ዕላማ ሥነ መንግስተኛታት ካብ ምዃን ምድሓን ኣይተኽኣለን። ብሄራውነት ብሓጺሩ መንነትን ህላወን ሓደ ብሄር ምዕቃብ ዕላምኡ ዝገብር ሥነ መንግስታዊ ምንቅስቓስ እዩ። እዚ ህላወ ምዕቃብ ዘድልዮ ድማ ስኽ ኢሉ ዝኾነ ሓበራዊ ውርሻ ንምዕቃብ ዘይኮነስ፣ ንውልቃዊ ረብሓ ኣባላት እቲ ብሄር እንትበሃል እዩ። ውልቃዊ ረብሓ ዕላማ እንተኾይኑ ንምንታይ ብሄራውነት ኣድለየ ንዝብል መልሱ ግልጺ እዩ፡ ሰባት ሓንሳብ ኣብ ሓደ ብሄራዊ ዓውዲ ምስ ተፈጥሩ ካብዚ ብሄራዊ ዓውዲ ወጻኢ ውልቃዊ ረብሖኦም ምውሓስ ኣብዛ ዘለናላ ናይ ብሄራት ዓለም ብጭቡጥ ዓቐብ ኮይኑ ስለ ዝተረኽበ እዩ። ካብ ብሄራዊ ኮነ ካብኡ ብታሕቲ ቀቢላዊ እውን እንተኾነ መንነት ወጻኢ ዝኾነ ህላወ ስለ ዘየለን፣ ኣብ ዘበናዊ ዓለም ድማ ብሄራዊነት ዘይብሎም መንግስታት ስለ ዘየለዉን፣ ንብሄራዊ መሰል ዘየኽበርካ ንውልቃዊ መሰላት ምኽባር ዘይሕሰብ ምዃኑ ዘገርም ኣይህልዎን። ስለዚ ብዛዕባ ረብሖኦም ዝግደሱ ህዝቢታት፣ ብዛዕባ ብሄራውነቶም እውን ክግደሱ ግቡእ ይኸውን።